Nga 12 deri më 15 tetor 2026, një delegacion i përbashkët serbo-shqiptar nga Kosova vizitoi Brukselin dhe Hagën në kuadër të iniciativës “Nga ‘Integrimi i serbëve të Kosovës’ drejt një kontrate të re shoqërore për një Kosovë vërtet shumetnike”, e cila zbatohet bashkërisht nga Hapësirë/a për Ndryshim Shoqëror (Space/s) dhe Center for Affirmative Social Action (CASA), me mbështetjen e Ambasadës së Mbretërisë së Holandës në Kosovë.

Delegacioni përbëhej nga përfaqësues të organizatave zbatuese, të Platformës së Shoqërisë Civile të Serbëve të Kosovës dhe të shoqërisë civile shqiptare të përfshirë në iniciativë. Vizita kishte për qëllim promovimin e qasjes së Kontratës së Re Shoqërore, forcimin e përfaqësimit ndërkombëtar dhe shqyrtimin e mundësive për mbështetjen e mëtejshme të iniciativës.

Në Bruksel, delegacioni u takua me Marko Makovec, Këshilltar Kryesor për Pajtimin dhe Normalizimin në Ballkanin Perëndimor në Drejtorinë e Përgjithshme të Komisionit Evropian për Zgjerimin dhe Fqinjësinë Lindore (DG ENEST); me anëtarë të Parlamentit Evropian dhe stafet e tyre, në një takim të organizuar nga eurodeputeti Gordan Bosanac; si dhe me këshilltarët e Përfaqësuesit të Posaçëm të BE-së për Dialogun Beograd–Prishtinë në Shërbimin Evropian për Veprim të Jashtëm (EEAS).

Diskutimet u përqendruan në kontributin e mundshëm të iniciativës Kontrata e Re Shoqërore në procesin e pajtimit dhe në dialogun ndërmjet Kosovës dhe Serbisë, të lehtësuar nga BE-ja. Delegacioni paraqiti perspektiva mbi gjendjen dhe shqetësimet e komuniteteve në Kosovë, duke theksuar nevojën që vetëqeverisjes lokale t’i kushtohet vëmendje më e madhe në kuadër të dialogut politik. U theksua gjithashtu rëndësia e të drejtave të pakicave dhe të drejtave kolektive, si dhe e dialogut kuptimplotë ndërmjet serbëve dhe shqiptarëve të Kosovës.

Në Hagë, delegacioni u takua me përfaqësues të Zyrës së Komisionerit të Lartë të OSBE-së për Pakicat Kombëtare dhe me ekipin për Ballkanin Perëndimor të Ministrisë së Punëve të Jashtme të Holandës. Përfaqësuesit e Ministrisë u informuan për aktivitetet dhe arritjet e deritanishme të iniciativës, ndërsa delegacioni mori informacione mbi planet e ardhshme lidhur me programin MATRA.

Vizita ofroi gjithashtu mundësi për të diskutuar perspektivat e bashkëpunimit të mëtejshëm ndërkombëtar dhe mbështetjen e mundshme financiare për vazhdimin e iniciativës.

Duke u mbështetur në përvojën e vizitës së mëparshme për përfaqësim ndërkombëtar në Berlin, takimet në Bruksel dhe Hagë ishin pjesë e përpjekjeve të vazhdueshme për të përfshirë perspektivat e shoqërisë civile në diskutimet ndërkombëtare për të ardhmen e Kosovës dhe për të promovuar një qasje më të gjerë shoqërore ndaj pajtimit dhe dialogut politik.